Tag: gasëtta

Feste ch’a finisso (nen)

La festa dël Piemont ch’a fà 46 a finiss cost saba – dòp-mesdì e sèira – ant la sede dël sìrcol Langa Astsan-a. Ël programa a l’é ambelessì.

Për dila con Silvana e Clara:

A ve spetoma tucc a sfojè la meria ansem a nojacc!

Ma për na festa ch’a finiss, n’àuta a ancamina: përchè saba a-i sarà ‘l passage dle consigne a la comun-a ‘d Pianëssa, e an particolar a l’associassion Gorisa che a ospiterà, dël 2014, la festa nùmer 47.

Da signalé ëdcò, ël di dòp, la festa dl’associassion ël Sol ëd j’Alp (programa ambelessì).

Ròbe cite, as capiss; ma ròbe bele.

02/10/2013 Aggiungi commento

Ël Piemont an Langa

Monastero I l’avìa parlà ambelessì dla festa dël Piemont ch’a fà 46, organisà dal sìrcol coltural Langa Astsan-a.

Bin, la festa a séguita cost saba: al castel dël Monasté, a des ore, a-i sarà n’ancontr an tra j’associassion piemontèise. La ciaciarada a seguiterà peui ant ël disné ofert an semplicità dal sìrcol Langa Astsan-a.

Al dòp-mesdì as podrà visité ‘l castel, e a singh ore a-i sarà la presentassion dël lìber Monastero Bormida e le storie del suo patrimonio. Ambelessì ël programa complet e ij detaj.

Mi, am dëspias, i podrai nen partissipé; ma i conserv andrinta al cheur, e i porterai sempe con mi, l’arcòrd dl’acoliensa càuda, sempia e soasìa ch’i l’hai avù, con mé famija, ël dì ch’i son andàit ambelelà. Gent ëd gran cheur; e ij mé letor, donca, a son anvità.

11/09/2013 1 commento

Arneuv dij Vot ëd Soperga

Volenté i segnal na bela manifestassion organisà da Gioventura Piemontèisa cost saba e costa domìnica: l’arneuv dij Vot ëd Soperga.

Ël programa complet a l’é ambelessì.

Am pias, dzora ‘d tut, l’idèja ‘d buté, saba al calé dël sol, un lumin fòra dla fnestra (un pòch ëdcò përchè a l’é l’ùnica ròba che da sì, da la montagna an mes al mar, i peuss fé):

I esponoma tùit un lumin avisch fòra dle fneste ‘d nòste ca, parèj ëd com a l’é fasse për trèi sécoj.

Na cita festa për la nòstra patria cita.

04/09/2013 Aggiungi commento

Premi Gianni Oberto 2013

I segnal na bela oportunità për chi ch’a l’é laureasse an literatura an tra ‘l 2009 e st’ann ansima a n’argoment gropà al Piemont: ël Premio Gianni Oberto 2013.

Tute j’anformassion a son ambelessì.

19/06/2013 Aggiungi commento

Ël piemontèis? Na lenga da salvé

A scriv Vittorio Bertola ansima a soa pàgina Facebook:

So che è un tema difficile e non prioritario, ma (con mia sorpresa) dopo un anno di attesa il consiglio comunale ha approvato il nostro ordine del giorno che chiede al Parlamento di inserire il piemontese tra le lingue minoritarie riconosciute ufficialmente nella legge 482/99, come da appello già approvato da tanti comuni piemontesi di ogni colore politico. Non sosteniamo inesistenti superiorità locali (la tutela peraltro andrebbe concessa a tutte le lingue locali d’Italia e del mondo) e nemmeno vogliamo alimentare stupidaggini leghiste, ma vorremmo tutelare un patrimonio culturale millenario che, bello o brutto, esiste soltanto qui e che sparirà nel giro di un paio di generazioni se non facciamo qualcosa per salvarlo.

An sël sit dla comun-a ‘d Turin a-i é ël comunicà ufissial.

Mi ‘d polìtica i na capiss pòch, ma quaicosëtta an sl’argoment i la sai.

1. A-i é tanta ignoransa (ant ël sens etimològich dël termo, gnun as senta ofèis) an sël tema, a parte da chi ch’a dovrìa fé le legi an giù (in primis la distinsion an tra lenga e dialèt).

2. Purtròp […] continua a leggere »

10/04/2013 4 Commenti

Festa dël Piemont ch’a fà 46

drapoOrganisé la festa dël Piemont a l’é n’onor e un badò ansema. (Ambelessì quàich mé pensé relativ a quand a j’era tocane a noiàutri, singh agn fà.)

Bin, st’ann a-i toca al sìrcol coltural Langa Astsan-a. E ‘l programa a l’é sostnù: as ancamin-a ai 18 ëd magg, a Coni, con ël passagi dël drapò, e as va anans fi-a ai 5 d’otober a Loasseul, con la festa Andoma a sfojé la meria.

Ambelessì ‘l programa complet, e ambelessì tuta la stòria. Për lòn ch’am rësguarda, i na parlerai sens’àutr pì anans an manera estèisa, ma a j’era important për adess dé la neuva.

Last but not least: un gròss, gròss, gròss mersì a Clara Nervi për lòn ch’a fà.

20/03/2013 1 commento

Giuseppe Sanero, Le “lenghe” dël Bòsch dël Mërlin

Polyporaceae A l’é n’idèja ch’i l’hai da tanti agn. I peuss nen dì da sempe, përchè quand ch’i j’era masnà tut antorn a mi a j’era piemontèis e donca distingue le lenghe a j’era nen na ròba con un sens, ma im arcòrd che antorn ai 25 agn – na vinten-a d’agn fà – i l’avìa provà a viré Orazio an piemontèis (mersì, sempe mersì për sòn a Riccardo Massano): la prospetiva a cambiava.

Bin, da anlora l’idèja mia a l’é che ‘l piemontèis, come lenga milenaria, as peul dovresse për parlé ‘d tut ma pròpi ‘d tut. E i son nen sol an costa matarìa: pr’esempi quàich dì fà a l’é surtìe l’ùltim nùmer dl’arvista “Il micologo” ch’a pùblica n’artìcol ëd Bepe Sané (Dragonòt), anté che l’autor a descriv “cheiche Polyporaceae ch’a chërso ant ël Bòsch dël Mërlin”.

Bin, për mé cont a l’é na bela ròba. E a l’é bel ch’as sapia.

23/01/2013 1 commento

Un lìber për Natal

Come tuti j’agn, la Ca dë Studi Piemontèis a organisa an soa sede la mostra “Un libro per Natale”, tradissional esposission ëd publicassion sia soe che d’àutre ca editris, ma sempe gropà al Piemont e a la lenga piemontèisa.

L’inaugurassion a sarà lùn-es 10 dzèmber, da quatr e mesa a eur ore, con un brìndes ëd bon auguri (“un brindisi al veleno / a chi ci vuole male”, a dirìo ij Negrita – ma noiàutri piemontèis i l’oma për fortun-a “un cristo personale / che ci perdonerà”).

L’esposission a seguiterà fin-a al 21 dzèmber (dal lùn-es al giòbia 9-12,30 / 14,30-18, al véner 9-12,30; saba 15 fin-a a ses ore).

05/12/2012 Aggiungi commento

Concors ëd piemontèis a Moncravel

La neuva a ven da Lissànder Motin (për lese quaicòs ëscrit da chiel as peul andesse ambelessi, ambelessì e ambelessì), e donca a chiel la paròla:

La Comun-a e la Pro Loco ‘d Moncravel a soagno ‘l prim concors literari ‘d poesìa e pròsa an lenga piemontèisa.

ARGOMENT: lìber

SESSION: 1) poesìa 2) conta

CONDISSION: • usage dla grafìa unificà conform a la codificassion dla Companìa dij Brandé • a vniran acetà ëdcò euvre scrite con ëd grafìe “lìbere” • minca un partecipant a podrà concore con un màssim ëd n’euvra për session • ij travaj a dovran nen passé le 4 facià ëd papé formà A4 për la session conta e le 2 facià për la session poesìa • tute le composission a dovran esse anédite • ij travaj a andaran spedì an 4 còpie contnùe an n’anvlòpa. J’euvre a dovran esse sotsignà con na stranòm. Nòm, nòm ëd famija, adressa, data ëd nàssita e a andaran anserì an n’anvlòpa pì cita con […] continua a leggere »

28/11/2012 2 Commenti

Ij prim 45 agn dla Badia Corale Val Chisone

Bin, costa a l’é na segnalassion che an part a së slontan-a dal piemontèis.

It vintre an cost sit e it ven-e salutà da na bela version dla Bela bergera. Na coral ch’a esist da 45 agn. (Mi, ch’i n’hai 45, i sai lòn ch’a veul dì.)

Ansima a YouTube as peul scotesse na canson (a sarà ‘l termo giust? I son tròp ignorant an mùsica), tant për fesse n’idèja.

E cost saba, a Pinareul, a neuv ore ‘d sèira ant la basilica ‘d San Murissi, la Badia Corale Val Chisone a tnirà un consert për arcordé ij 45 agn d’atività e ‘dcò presenté l’ùltim CD, Venés, venés. L’intrada a l’é a gratis, lor a në speto.

21/11/2012 Aggiungi commento