Parland dl’avnì dël piemontèis, tròpe vire a më smija ch’i giro antorn a la question ma ch’i rivo mai da gnun-e part.
Com dì: an manco sempe disneuv sòld për fé na lira. Tròpi condissionaj, tròpi desiderata e pòchi fàit.
A l’é nen na ròba ch’as fà da sola, e le fòrse dij singoj – o bele dj’associassion – a basto nen. Ël piemontèis a l’é nen na ròba svicia, com ch’as peul dì pr’esempi dël catalan (ij fotbaleur as sugnerìo mai ëd parlé an piemontèis) o, da na mira diversa, dël forlan ëd Pasolini.
A sarìa necessaria na gròssa operassion ëd marketing: polìtica, sòld e via fòrt. Naturalment a-i son nen ij sòld për na ròba parèj (ch’a j’anteressa a gnun): donca as farà nen, mai, a venta ch’is na rendo cont.
Sòn a veul nen dì che ‘l piemontèis a meuir, përchè che ij malavi terminaj a son – për dila con le paròle ‘d Tavo Burat sità da Fabrissi Arnaud – ancora viv e pa ancora mòrt. A veul dì però che le fòrse a son coste e a basto nen, nì a basteran doman. Ma navigare necesse vivere non necesse, a noi an basta.
e si, ël piemontèis a-j anteressa a bin pòche përson-e e noi ch’i lo sovagnoma i soma tròp ràir e spatarà …
an piòta
Marketing per el piemunteis o el piemunteis per el marketing ?
La lenga piemunteisa a l’ha n’avnì se a ven cunsiderà ne strüment ed cumünicassiun, ütil per fé savej lon ch’a-i é ed bun e ed bel an Piemunt o fait da piemunteis.
Ma perché el piemunteis a pössa esse cunsiderà n’ütiss vàlid per la cumünicassiun marketing a venta ch’a pössa esse capì almanc da chi el piemunteis a lo parla, e a je smija franc natüral lese cume a parla quand ch’a tröva scrit « tuma d’Alba, dusset ed Dujane, cafè dla Tur, Ostu del Torcc, …..).
Dunca, se la lenga piemunteisa a völ avej n’avnì, a venta ch’a pössa scrivse an manera da esse cunsiderà « natüral » da chi la parla.
Natüralment a l’é nen dit che son a basta per tene viva la lenga piemunteisa; ma a l’é ed sicür méj che passé el temp a piuresse adoss e …. carié ed miserie chi el piemunteis a lo scriv cume je smija méj per fesse capì.
Nigra, per esempi.
Tanti bej salüt
Car Gianni, i të scrive «le fòrse dij sìngoj a basto nen». A l’é pro vera. Però, tant për dì e mach për sugné, butoma che ancheuj a-i sia an gir na masnà che un doman a dventrà un neuv Mistral. Col-lì sì ch’a sarìa un bel colp për ël piemontèis. Si sòn a podrà mai realisesse a sarà mersì a tut ësfòrs che tuti nojàutri, sìngoj o associassion, i l’avroma fàit përchè la fiama a së smortèissa nen.
Car amissi piemunteis mi sun Argentin magara son nen tan bon scrive lo ca mi vol-ò ca custa fiama ess distijssa maij
Bin vnù Ramon, e compliment për tò piemontèis!