La festa dël Piemont ch’a fà 46 a finiss cost saba – dòp-mesdì e sèira – ant la sede dël sìrcol Langa Astsan-a. Ël programa a l’é ambelessì.

Për dila con Silvana e Clara:

A ve spetoma tucc a sfojè la meria ansem a nojacc!

Ma për na festa ch’a finiss, n’àuta a ancamina: përchè saba a-i sarà ‘l passage dle consigne a la comun-a ‘d Pianëssa, e an particolar a l’associassion Gorisa che a ospiterà, dël 2014, la festa nùmer 47.

Da signalé ëdcò, ël di dòp, la festa dl’associassion ël Sol ëd j’Alp (programa ambelessì).

Ròbe cite, as capiss; ma ròbe bele.

Fòto dë Stefano De Rosa

Ël programa complet a l’é ambelessì.

Am pias, dzora ‘d tut, l’idèja ‘d buté, saba al calé dël sol, un lumin fòra dla fnestra (un pòch ëdcò përchè a l’é l’ùnica ròba che da sì, da la montagna an mes al mar, i peuss fé):

I esponoma tùit un lumin avisch fòra dle fneste ‘d nòste ca, parèj ëd com a l’é fasse për trèi sécoj.

Na cita festa për la nòstra patria cita.

I segnal na bela oportunità për chi ch’a l’é laureasse an literatura an tra ‘l 2009 e st’ann ansima a n’argoment gropà al Piemont: ël Premio Gianni Oberto 2013.

Tute j’anformassion a son ambelessì.

Organisé la festa dël Piemont a l’é n’onor e un badò ansema. (Ambelessì quàich mé pensé relativ a quand a j’era tocane a noiàutri, singh agn fà.)

Bin, st’ann a-i toca al sìrcol coltural Langa Astsan-a. E ‘l programa a l’é sostnù: as ancamin-a ai 18 ëd magg, a Coni, con ël passagi dël drapò, e as va anans fi-a ai 5 d’otober a Loasseul, con la festa Andoma a sfojé la meria.

Ambelessì ‘l programa complet, e ambelessì tuta la stòria. Për lòn ch’am rësguarda, i na parlerai sens’àutr pì anans an manera estèisa, ma a j’era important për adess dé la neuva.

Last but not least: un gròss, gròss, gròss mersì a Clara Nervi për lòn ch’a fà.

Come tuti j’agn, la Ca dë Studi Piemontèis a organisa an soa sede la mostra “Un libro per Natale”, tradissional esposission ëd publicassion sia soe che d’àutre ca editris, ma sempe gropà al Piemont e a la lenga piemontèisa.

L’inaugurassion a sarà lùn-es 10 dzèmber, da quatr e mesa a eur ore, con un brìndes ëd bon auguri (“un brindisi al veleno / a chi ci vuole male”, a dirìo ij Negrita – ma noiàutri piemontèis i l’oma për fortun-a “un cristo personale / che ci perdonerà”).

L’esposission a seguiterà fin-a al 21 dzèmber (dal lùn-es al giòbia 9-12,30 / 14,30-18, al véner 9-12,30; saba 15 fin-a a ses ore).

La neuva a ven da Lissànder Motin (për lese quaicòs ëscrit da chiel as peul andesse ambelessi, ambelessì e ambelessì), e donca a chiel la paròla:

La Comun-a e la Pro Loco ‘d Moncravel a soagno ‘l prim concors literari ‘d poesìa e pròsa an lenga piemontèisa.

ARGOMENT: lìber

SESSION:
1) poesìa
2) conta

CONDISSION:
• usage dla grafìa unificà conform a la codificassion dla Companìa dij Brandé
• a vniran acetà ëdcò euvre scrite con ëd grafìe “lìbere”
• minca un partecipant a podrà concore con un màssim ëd n’euvra për session
• ij travaj a dovran nen passé le 4 facià ëd papé formà A4 për la session conta e le 2 facià për la session poesìa
• tute le composission a dovran esse anédite
• ij travaj a andaran spedì an 4 còpie contnùe an n’anvlòpa. J’euvre a dovran esse sotsignà con na stranòm. Nòm, nòm ëd famija, adressa, data ëd nàssita e a andaran anserì an n’anvlòpa pì cita con scrit a sò estern la stranòm dovrà

COTISS: pa ‘d nen, partecipassion a gràtis

SCADENSA: j’euvre a dovran esse adressà ant ij 31 ëd mars del 2013 a:
Comune di Moncrivello, Assessorato alla Cultura
piazza Castello 6
13040 Moncrivello

PREMIASSION: la premiassion as tnirà ant la sala consijar dla Comun-a ëd Moncravel a 10 ore dla matin dij 28 d’avril 2013

PREMI:
• papé ëd mérit e cavagnin gastronòmich ai prim 3 classificà ëd minca session
• un prim premi al partecipant pì giovo
• un prim premi al partecipant pì ansian
• un premi special al prim classificà ëd “Moncravel e anviron”, ch’a sia a soa prima partecipassion a un concors ëd piemontèis
• ij premi a podran esse artirà ëd përson-a o trames un delegà ant la giornà dla premiassion

Dòp la premiassion a-i sarà la possibilità ëd disné anté la Pro Loco.