La sostansa a l’é costa: sòld a-i na j’é nen. E a-i na j’é nen përchè le ròbe dël Piemont a interesso a pòchi (ch’a l’abio ‘d sust o nò a l’é secondari, a smija).
Ma la Ca dë Studi Piemontèis a va anans l’istess. E saba 18 dzèmber a 5 ore al teater San Giusep (Via Andrea Doria 18, Turin) a l’ha organisà la Vijà piemontèisa. Poesìa e mùsica për Natal, st’ann dedicà a Angelo Brofferio.
A recito, a canto, a parlo e a son-o “për gnente, a gratis, për ël Piemont” (com ch’a dis ël programa) un baron d’anime bele, artista an sens largh ch’a val la pen-a sente.
Se a la polìtica a-i na fà gnente dël piemontèis, a noi an na fà. A venta essje.
Commenti
A j’ero tanti, ij “carboné” (le ròbe dël Piemont a interesso a pòchi, as dis – ma miraco a l’é nen sémper vera), iér sèira, a la “Vijà piemontèisa” (idealment dedicà a Tavo, a n’ann da la mòrt): Albina Malerba (l’ànima ‘d tut), Clara Nervi, Michele Bonavero, Davide Damilano, Luciano Ravizza, Mario Brusa, Bruno Gambarotta… e tanti àutri ch’i dësmentio (sigura), e tanti ‘d pì ch’i conòss (ancor) nen.
Ma an tute le manere un sentiment comun a esist – e sòn a l’é tant.