(Con un gròss, gròss mersì a costi doi amis sincer dël Piemont për avèjme lassà buté ambelessì ij sò tòch ëd Natal. A son j’auguri – a la bon-a ma ‘d cheur – për tuti coj ch’a-i veulo bin al piemontèis.)
Michel dij Bonavé (dij barbisin ëd Gambabòsch)
Vardand ël cel
Na tèila nèira foratà: la neuit ëd Natal,
am sotra con pensé creus d’inmensità
ch’a m’ampinisso dë sparm geilà.
Anciarm e afr ch’a van sotbrassëtta,
bësson ëd la vita tuta
mai separà,
am vòlo dantorn con bindej dj’arcòrd
ch’i l’hai gòj d’antërsé a fé cocarda
për na festa ’d gala sla vnùa dël Bambin.
Sguard ch’a susta stèila pnassùa
vardand lassù ’ndoa lë sclint, për boneur,
l’é nen antamnà da nòstri pecà bondos.
Veuj ciadlé mè cheur al moment soasì
ëd ciòca ch’a son-a baudëtta ’d nassensa;
veuj o vorerìa?
Etern bautié d’onda ’nchieta o rispòsta
ch’i vad sercand pistand la fiòca pura,
mia seur fidela ’nt sa neuit ëscura.
Slargo la man ant la mesaneuit Santa
për strenz-ne tante sla carzà dla bin
e col soris che da la cun-a a spantia
sël mond na neuva speransa ’d pas,
sleiva d’un bòt tuta la gramissia van-a
con ij giasson ëd l’indiferensa uman-a.
—
Carlin Pòrta
Veuja ’d bin
Cand l’òm a fà na corsa lesta e fòla
su për j’arbèst dësbironà dla vita
e sò pé a pòsa nen sempre franch
su le lòse postà për la carzà,
a l’ha maitas gòj ëd trové na ròca
bin fongà ’nt la tèra e nen postissa,
për molé ’l sacapan ëd le miserie
e tiré ’n sospir a la neuva vita.
Parèj a l’é la veuja ’d bin ch’a nass
cand che ’nt l’aria a-i é ’l sentor dël Natal
a press n’anada ’d matan-e dròle.
A l’empiura dë sparm, sagrin, magon,
ël còrp a ciama l’arlass ant sò cheur
e sa stèila ch’a nass a-j dà ’l boneur.
Commenti
Bon Natal e bon ann neuv a tùit, e ch’a-i sia dun-a ocasion për ës-ciaresse!