Ho speso quattro secoli di vita
e ho fatto mille viaggi nei deserti
perché volevo dire ciò che penso
volevo andare avanti ad occhi aperti
Parèj a cantava Pierangelo Bertoli (chissà përchè, ma i pens che se a fussa sì adess a scotrìa volenté coste question), e parèj i podrìo dì ‘dcò për nòsta pòvra lenga piemontèisa.
La version curta a l’é ch’a l’é nen giust.
La version longa a l’é costa: la lenga piemontèisa, ch’a esist an forma scrita da des sécoj e a l’é parlà ancheuj da pì che doi milion ëd përson-e, a l’ha (pì) nen na lege ch’a la dësfenda. E alora chi che con ël piemontèis a travaja a deuv fé ‘l gir dij quatr canton për ciamé quatr sòld për fé le ròbe ch’a l’avrìa dirit ëd fé sensa ciamé da sì e da là, për – ant na paròla – garantije n’avnì a na coltura milenaria.
Antlora Gioventura Piemontèisa a l’ha organisà na petission. Ël but a l’é ‘d cheuje desmila firmé da presenté an Region përchè a ven-o pijà an considerassion le propòste già fàite e ansoma ch’as fasa na lege – ma për dabon – për la tùa ‘d nòsta lenga.
Ambelessì a-i é tuta la stòria. Al moment le firme a son pì o meno mila.
Alora lòn ch’a venta ch’i fasso?
Ch’i stampo (dëdnans e daré) cost mòdol, i-j lo fasso compilé e firmé a tutj coj ch’i conossoma e ch’a-i veulo bin al piemontèis e peui i-j lo pòrto o spedisso a Gioventura Piemontèisa.
Mi im ampegn formalment an costa manera: i cheujrai otanta firme për la fin ëd mars. Merco 30 mars i dirai ambelessì lòn ch’i l’avrai fàit. Chi ch’a-i veul bin a l piemontèis ch’a fassa l’istess, mincadun con soe possibilità.
Foma an pressa, na lenga a meuir.
Commenti
Bele che dëscarià e con ël mè nòm ‘me prim dla lista. I bèicoma ‘d cheujne na bela brancà ant la vira ‘d tranta dì.
Gran bel anunsi (as dì anunsi?) Gianni.
Grasji / Grassie e mersì
Nò Lissander, grassie a ti: sensa toa mail i l’avrìa nen falo.
As dis “anonsi” (o neuva), bele che graficament a sia nen tant bel da vëdde.
Mi, coma sòcio ‘d Gioventura Piemontèisa i ringrassio tuti coj che a buteran la signatura an manera ‘d rivè a coje 10.000 firme. Parej speroma che nòsta lenga mare a vena definitivament arconossua anche da L’Italia.
Grassie ancora
Roberto Ugo Maria FORCHERIO – Piemontèis – Turines – Valsusin
mi i l’hai mandà na mail a tute le përson-e ch’i sper ch’a podrìa
anteressaje e chèich firma a l’ha sortuje.
peui i l’hai tambussà a la
pro-loco ëd mè pàis sensa sucess e fin-a a n’àutra associassion ch’i
sper peuda avèj n’esit mejor.
i l’hai consegnà mòdol pì papé con
spiegassion dla petission a dontré përson-e che tra ‘n pàir dë sman-e i
fas cunt ëd ciameje.
an piòta
Lissànder
A l’é tant lòn ch’it fà Lissander, ij mé compliment!
Mi i giontrìa mach na ròba. Tuti i soma ciapà da mila ròbe da fé, sertament na petission a l’é na priorità për bin pòchi. Alora a venta nen speté che quaidun a firma, ma buteje ‘l papé sota ‘l nas, spiegheje an doe paròle la question e fé firmé.
A sarìa com dì campé ‘l cheur dë dlà da l’ostacol e peuj andelo a pijé.
A l’é an sostansa la providensa an sens goethian (sità da Batista):
“Fin-a a che un as compromët nen, a-i é esitassion, possibilità ‘d torné andaré e sempe sproporsion. Rispet a minca at d’inissiativa (e creassion) a-i é mach na vrità elementar; l’ignoransa a massa un nùmer infinì d’idèje e ‘d pian splendid. Quand che un as compromët definitivament, ëdcò la providensa as bogia. Minca sòrt ëd ròbe a capito për giuté, ròbe che dësnò a sarìo mai capità. Na corent d’event a ancamin-a da la decision, fasend levé a nòstr favor minca sòrt d’incident nen prevedìbij, ancontr e assistenza material, che gnun a l’avrìa sognà a podèisso vnì an costa manera. Tut lòn ch’it peule fé, o sogné ëd podèj fé, ancaminlo. Ël corage a l’ha andrinta ‘d chiel genio, podèj e magìa. Ancamin-a adess”.
Quand che un as compromët definitivament, ëdcò la providensa as bogia.
coj ëd Gioventura a l’han scrit che adess mal contà i dovrìo esse an sle 1.700 sotëscrission.
ciao
[…] smana fà i l’avìa parlà dla vajanta inissiativa – badò miraco a sarìa tèrmin pì precis – ëd Gioventura […]