Piemontèis ant ël mond: Lissànder Motin e ‘l Mosambich

Lissànder Motin, da tant temp n’amis ëd cost blògh (për savejne ‘d pì as peul andesse ambelessì e ambelessì), a l’ha fàit na bela esperiensa ‘d travaj an Mosambich. I l’hai ciamaje – e i lo ringrassio për avèjlo fàit – ëd contela ambelessì.

Enter Lissànder.

I veui ancaminé a conteve ëd sa mia cita esperiensa ëd travaj an partend da la viage ch’i l’hai fàit për andé al largh dla còsta dël Mosambich. E si, përquè pròpi ant ël mar dël Mosambich l’eni a l’ha na concession esplorativa anté ch’a l’ha trovà un-a dle pì gròsse arzervere ëd tuta soa stòria.

I son partì da la sede ëd San Donà Milanèis un merco dòp-mes-di e da Linate l’avion për Paris (aeropòrt Charles De Gaulle). Da Paris na traversà dl’Africa durà des ore e mesa (tuta la neuit) a l’ha portame fin-a a l’aeropòrt ëd Johannesburg. A des ore la matin aterage e giornà “lìbera” an obergi davsin a l’aeropòrt dla sità sudafrican-a. A Johannesburg a-i é vàire përson-e ëd “platura bianca” che antra ëd lor a parlo l’afrikaans antërment i “nèiro” a parlo ëd lenghe genite african-e.

A l’avìo racomandasse ëd nen aceté smon ëd gire turìstiche da përson-e nen conossùe, còsa ch’i l’hai osservà e parèj i son armanì tut ël di an obergi a virolé. Dël neuit a doi bòt i l’hai alveme për andé pijè ël rioplan ch’a l’avrìa amname ant ël nòrd dël Mosambich, scasi al confin con la Tansania, dòp un vol ëd tre ore e mesa.

Rivà ant l’aeropòrt (cit cit) pì da riva a destinassion, ch’as treuva ant la sitadin-a/vilage ëd Pemba, dòp ij contròj dël passapòrt, con l’elicòter a l’han amnane a sessanta chilòmeter da la còsta ant ël mar ans la nav perforatris Saipem 10k (10k a significa ch’a peul travajé con profondità d’eva fin-a a 10.000 pé, ch’a corispondo a apopré a 3.000 méter).

Mè mësté a l’é stàit col dë fé da colegament tra ël personal a bòrd e mè cap ufissi, oltra col ëd fé esperiensa. La preuva an oget a l’avìa coma but col ëd cheuje dl’idròcarbur prodòt (scasi completament gas metan) e oten-e d’anformassion sle caraterìstiche dl’arzevera.

An sla nav a-i ero (e a-i son) an sle vintesinch nassionalità diferente për un total ëd sentestanta travajeur.

Lòn ch’i l’hai da armarché a l’é la tecnologìa ampossanta an tren për performé dj’euvre dël géner.

Dòp un tërdes di i son tornà sla tèra an Mosambich andova ch’i l’hai podù beiché la përfonda povertà dla popolassion. L’arzigh a l’é che con l’ariv dij dané dël metan a-i riva ëdcò corussion e violensa, còsa ch’a l’ha za capitaie an Nigeria.

An Mosambich, ex colònia portoghèisa, la lenga ufissiala a l’é ël portoghèis, ma la popolassion – manco mal i dis mi – a parla soe lenghe ancestraj african-e.

Què giontaie a ës curt curt rapòrt ëd mia esperiensa ëd travaj african-a… i sper ch’i l’avrai d’àutre ocasion d’amprende e che mincadun a sia fier ëd soe orìgin për marcé pì sigur ant ël present e ant l’avnì, ch’a val a dì coma a l’ha scrit ël gran Edord Ignassi Calv: «Ognidun ant sò vilagi dev avèj la gelosìa dë spieghesse ‘nt sò linguagi».

Cerea a tùit!

Lissànder

Lascia un commento