Scaparon a l’é da sempe un leu dl’ànima për mi, mersì a col mat (dit con tuta la bin che i-j veuj; e ‘d chiel Orazio a dirìa: “Aut insanit homo aut versus facit”) ch’a lo ànima.
Bin, da sì a giugn cola colin-a a sarà pien-a d’atività e cors e ròbe e amprende e fé. La lista completa a l’é ambelessì. Mi i farai na cita part, cola ch’a rësguarda ‘l piemontèis (Parla pa! Ël piemontèis ancheuj: scotelo, parlelo, leslo, scrivlo). Ël but a l’é ëd fé na panoràmica ‘d nòsta lenga ancheuj; sensa dësmentié ij cit, ch’a son l’avnì ëd na lenga.
I faroma ‘dcò quàich pontà anvers la scritura. Già, përchè scrive na lenga a l’é important, a basta nen parlela. E a venta scrivla “pì da bin ch’as peul”, për dila con Barba Tòni; ma i l’hai ‘dcò la pretèisa ‘d dì che scrive an piemontèis a l’é belfé.
I ancaminoma la sèira ‘d merco 11 fërvé con na presentassion dël piemontèis: i sërcheroma ‘d capì la diferensa tra lenga e dialèt, i faroma na cita stòria dël piemontèis, i parleroma ‘d dissionari e gramàtiche, i faroma na cita introdussion a la grafìa.
Na vira al mèis i rivroma a la festa final dij 24 ëd giugn (Conta na conta), con Oscar Barile, Batista ‘d Cornaja, ij Musicant d’Alba e d’àutri amis: na manera anciarmanta e alegra për saré costa longa teorìa ‘d segn ëd vitalità.
Ça va sans dire ch’i vë spet.
Commenti
Bela inissiativa! Mach na ròba am lassa antërdoà: ambelelì a parlo Langareul. Second toa esperiensa la grafìa del Piemontèis a l’é bastanta për ëscrive an col dialèt o, al contrari, a-i é damanca ‘d fonemi particolar?
Comsissìa mi i spero ‘d podèj ven-e a sente, perlomeno la prima lession… I l’hai marcalo an sla agenda.
Grassie René, s’i të vnirai it im farai piasì.
An sla grafìa: l’ùnich problema, për mia manera ‘d vëdde, a l’é col dla ‘r’ ch’a sta tra la ‘r’ e la ‘l’, e che an “Rastlèire” e da d’àutre part a ven segnà con ël caplèt.
D’àuta part la grafìa a l’é na convension, e a esist nen na grafìa ch’a peussa cheuje le diferense ch’a-i son, tant për dì, tra Cher e Riva; ma già avèj un sistema ch’an përmëtt dë scrive ij dialèt dël piemontèis a l’é na bela ròba.
Mia idèja pì general – ël pont d’ariv – a l’é amprende doi sistema: a scrive an piemontèis dla koinè e dovrand ël dialèt dël tò pais. Amprendù un a l’é belfé passé a lë scond.
[…] Parla pa! feb 11 […]