Montemale, festa dell’Assunta 2013

“Il mio paese sono quattro baracche e un gran fango, ma lo attraversa lo stradone provinciale dove giocavo da bambino. Siccome – ripeto – sono ambizioso, volevo girare per tutto il mondo e, giunto nei siti più lontani, voltarmi e dire in presenza di tutti: Non avete mai sentito nominare quei quattro tetti? Ebbene, io vengo di là”.
Cesare Pavese

Montomal, ij mé vintesingh letor a lo san, a l’é mé pais d’elession, leu ‘d partense e d’artorn. Cola ca an mes ai bòsch, bele ch’a l’abia gnente dë special, a l’é ‘l pòst che, an sarand j’euj, për mi a l’é ca.

Come tuti j’agn (ambelessì la notissia dl’àutr ann), cost a l’é ‘l moment ëd fé un pòch ëd ciadel. La festa a ancamin-a stasèira, con na gara a carte (a la belotte) a l’òsto dël Castel, ma ‘l sénter a sarà n’àutra sman-a:

– lùn-es 12 agost sèira spetàcol ëd teàter dë stra;
– màrtes gara a la petanca;
– merco dòp-mesdì gara con bòce quadre, a la sèira raviolà e – dòp sin-a – ël bal;
– giòbia 15, Feragost, mëssa granda a ondes ore – cost a l’é ‘l ver sénter dla festa, ch’as ciama dl’Assunta nen për cas –; e al dòp-mesdì festa dël pais (gieugh për ij cit, degustassion ëd torte fàite an ca, baj popolar); a la sèira rustìa (pizza, i dirìo an lenga dominanta) an piassa e peui as bala torna;
– véner sèira polenta e bal, e la festa a sarà finìa.

Ël programma complet a l’è an sla pagina FB dla ProLoco Montemale.

Finìa la festa ‘dcò mi i partirai anvers ël mesdì, a la vòlta ‘d mia patria seconda. Ma antratant i vë speto an costi di ant ël paisòt con l’ànima andrinta.