Doman, giòbia 22 ëd magg a ses ore, ël liber djë stranòt ëd Cher a pija la stra ‘d Turin: a sarà presentà a la Ca dë Studi Piemontèis (Via Ottavio Revel 15, Turin).
I saroma pòchi, naturalment, ma tuti a son invità. A na dëscoreran Gianfranco Gribaudo e Giovanni Ronco – doi lenghista avosà, a fà nen damanca ‘d gionté ëd paròle – con Valerio Maggio e Cesare Matta, visadì ij curator dl’euvra.
A l’é na ròba cita, ch’a serv a gnente. Ma a l’é la nòstra stòria, i soma noi. Pavese, come sempe, a ven a taj:
Avere una tradizione è meno che nulla, è soltanto cercandola che si può viverla.
Ancontromse, noi rari nantes in gurgite vasto. A l’é bel.
Commenti
‘Me ch’a l’é andàita la presentassion jer sèira?
A l’é stàit un bel ancontr. La pieuva ch’a j’era staje a l’ha miraco tenù lontan quaidun; ma i sarìo stàit an tute le manere an pòchi, as capiss. I j’ero anviron 20 – 25 përson-e.
Gribàud a l’ha parlà bin (come sò sòlit, ma a fà sempe piasì scotelo), e parèj ël professor Ronco e ‘dcò Cesare Matta. Albina a l’ha fàit j’onor ëd ca com ch’a sa fé chila.
I soma pòchi ma i lo soma. A l’ha ancor sens ancontresse për parlé dël piemontèis ancheuj? I son nen sigur ëd savèj la rispòsta; ma peui pen-a vintrà a la Ca dë Studi am ven ancontra Tòjo Fnoj e sò soris, am saluta e am ambrassa e alora i capiss përchè i but tant temp a fé ëd ròbe che për ël mond a l’han gnun valor.
Na vinten-a ëd përson-e për un rancontr pùblich a l’é tut àutr che pòch. A son motobin ràire le manifestassion ch’a tiro pi ‘d gent. Dzortut al di d’ancheuj, che tut as fa an manera virtual, dnans a n’ordinator, fé sposté vint përson-e a l’é un grand sucess.
[…] Jë stranòt ëd Cher – a Turin mag 28 […]