Quatr agn fà i l’avìa butà ambelessì na lista comentà dij sit esistent an piemontèis, lista ch’i l’hai peui agiornà doi agn fà.
An doi agn tante cose a cambio: i don antlora ambelessì na lista agiornà. Naturalment a l’é fàita seguend lòn ch’i conòss, e donca chi ch’a sa ch’a parla!
1. Pijoma l’andi
As peul nen nen ancaminesse da la Wikipedia piemontèisa, che con squasi 64mila artìcoj (a j’ero pì ‘d 60mila doi agn fà e 35mila mach quatr agn fà) e al pòst nùmer 65 ant ël mond (un pòch pì an bass ëd doi agn fà, quand ch’a j’era al nùmer 57) a l’é diventà na sòrta ‘d manifest e drapò dël piemontèis dzora la Ragnà.
2. Giornaj e scartari
An piemontèis, la rubrica d’Albina Malerba e Giovanni Tesio ansima a “La stampa”.
La pàgina ‘d “Piemontèis Ancheuj”: jë sfòrs ëd Michel dij Bonavé e tanti amis ëd nòsta lenga.
J’archivi d’Assion piemontèisa, l’arvista ‘d bonanima ‘d Beppe Burzio (i l’hai mai conossulo e am dispias), ch’a l’é stàit un pòch ël pare putativ d'”é!”
3. Facebook
L’importansa ëd Facebook a chërs an costi agn. An tra i grup pì ativ i segnal:
– Noi i parloma piemontèis, për ciaciaré sensa gena e antratant amprende a scrive o milioré la scritura (mersì, dzora ‘d tut, al gròss travaj ëd Simon Uslengh);
– Giovo e piemontèis, grup pì “técnich”, për j’ambalinà dla lenga (cudì dai doi Emanuele, Miola e Regano);
– Bogianen, ch’a l’ha 660 “am pias” (e donca un bon séguit) ma che am piasrìa ch’a l’avèissa ‘dcò quaidun che, oltre a mi, a jë scriv ansima.
4. J’associassion
A-i son peui ij sit dj’associassion (ëd sigura i na dësmentierai quaidun-a), sempe pì an dificoltà përchè a la polìtica e ai politicàire a-i na fà nen ëd guerné na lenga e na coltura. Alfabeticament:
– Ca dë Studi Piemontèis, ch’am pias consideré la prima inter pares, e ch’a sta donca fòra da la lista;
– Ël Sol ëd j’Alp: Gioanin Ross a Biela;
– Gioventura Piemontèisa, un bel sit con tanti agiornament;
– Nòste Rèis.
5. Për finì
Ël sit dël Consej regional an piemontèis.
arsorsepiemonteise, ël sit ëd Borichèt che pòch a pòch a së slarga (minca tant i pijo quaicòs da les-je a mé cita cita).
Giovanni Delfino a l’ha butà ambelessì un përfond ëd ròba ansima a Luigi Olivero.
Piemontèis, vocabolari e gramàtica ‘d Bré.
Ambelessì Livio Tonso a part dal canavzan për slarghesse a tante ròbe dël piemontèis.
Ël mè Piemont, ëd Paolo Castellina.
Ël piemontèis a l’é na ròba cita, e donca a j’anteressa a pòchi; ma a noi, a noi rari nantes in gurgite vasto, a noi an na fà.
Commenti
Gracie per questi siti che prendo come molti preciosi.
Gracie tanto.
Im përmëtto ëd gionté un sit: https://incubator.wikimedia.org/wiki/Wt/pms/P%C3%A0gina_prinsipal
A l’é ‘n dissionari an costrussion; a farìa part ëd coj proget colaborativ a sorgiss duverta, ma an efet ant ës moment-sì i-i son bele mach mi a compilelo.
Brav Riccardo!
“Se non lo facciamo oggi non lo facciamo più; se non lo facciamo noi non lo fa nessuno” (Federico Bavagnoli)
http://digilander.libero.it/dotor43/index.html
Cerea monsù Gianni. Cost a l’é n’àutr grand bel sit, i dirìa ecessional. A lo soagna ‘l professor Carlo Demichelis. la part ëd gramàtica a l’é ‘n bin fornìa (a l’é an trè lenghe!), ma im përmëtto ‘d consejé la part ëd matematica e fisica andoa as treuvo dij manoaj tutafàit virà an piemontèis. ch’a lasso bin pòca maneuvra a lor ch’a miro a classé ‘l piemontèis com un dialèt.
It l’has rason, Simon. Im ricòrd dël sit dël professor Demichelis già dai temp d'”é!”, donca des agn fà o giù da lì (adess i vad a memòria, ma a më smija ch’i l’avèjsso publicà n’artìcol dzora a l’arvista pròpi ansima a col sit). Peui i l’avìa squasi dësmentiamne, ma as capiss ch’a l’é an prima linea an tra ij sit an piemontèis – e donca mersì për avèjlo arcordà!
Ch’as figura, mersì a chiel per costa sitografìa ch’a l’é ben ùtil.
An particolar dsadess ël professor a l’é an camin ëd viré ‘n manoal ëd fisica dij quant. Ch’a l’é na còsa ch’a venta pro esse bon ëd féla! A l’é na përson-a, ‘me tante, ch’a travajo silensiose, ma a fan ëd ròbe decisive. Cerea e bon travaj